ضو القمر والليل..والشاهي..والدوه
والكستنا وقهوتن مره
جا وليدي وسألني
يبا ابطلبك بدقيقه من وقتك
ابشر بعزك سم وقتي كله لجلك وتحت رجولك كل شي يوصلك
العز عزك طال عمرك
يبا
اشترلنا وطن بعد اذنك
فزيت فزتن شلعت قلبي
وغيرت الوان وجهي
وش بلاك يا وليدي
وش اللي صار
وليش بعينك دمعتن قشره
يبا
يبا رفيجي بالمدرسه يقول
اني بدون
ولا سألت ذيك الابله
تقول
حبيبي انت ماعندك ماعند العموم
سكتت وقتلها
ابله وشفيج يا ابله
عندنا بيت جنه قصر وش كبره
وامي من الذهب عندها زوود ويااا كثره
واختي جمالها تخشه بنقاب وعباه من سحره
وانا الاولي بالصف يا ابله
سكتت
وقالت انت من ولده؟
انا ولد ناس اجاويد اهل نخوه وفزعه
قالت من وين؟
جاوبتها باعلى صوتي
من بيتنا كل يوم اجي مع سايقنا
قالت وشنهو وطنك؟
قتلها مدري ماعرفه
والله ماشفته
قالتلي واهي تبتسم ابتسامه صفره
ولا بتشوفه اللي مثلك ماعنده
قتلها ابله عادي
اشتري واجيبه لج بكره
يبا
عفيه لا تنسى
سير السوق ولا الوكاله ولا الجمعيه
وجبلنا منه
شرقت بريجي المر من اللي سمعته
وخشيت عن وليدي الدمعه
وقلتله يا وليدي الوطن ماينشرى
الوطن ننخلق منه
اجل يبا
احنا وين انخلقنا
؟؟؟؟؟
مدري يا وليدي الكبر جايد
والسموح نسيت شنو وطننا
عاتي يبا لا تكدر لا جا باكر
اقولها وانا مستانس
احنا من بطن امنا وهذا هو وطننا
ليست هناك تعليقات:
إرسال تعليق